الاسم .. كريم وليد عبد الرازق
الشهرة .. كاريو ستايلر
المحتوى .. مصمم جرافيك
بدأت مشواري في مجال الجرافيك ديزاين سنة 2016، ووقتها كان عندي 13 سنة بس.
كنت لسه طفل، بس كان جوايا حلم كبير... ولما اكتشفت إن مفيش مصمم جرافيك في سني، قررت أشتغل على نفسي وأثبت إني أقدر أكون حاجة.
ومع الوقت، من "أصغر مصمم في مصر" بقيت واحد من أفضل المصممين اللي قدروا يوصلوا لنجاحات وتعاونات ضخمة في الوطن العربي.
بدأت أهتم بكل تفصيلة في شغلي، أختار ألواني بعناية ممتازة، وأشتغل على كل مشروع كأنه أهم حاجة في حياتي.
وفي كل مرة، جودة شغلي كانت بتعلى، وأسلوبي بقى يلفت النظر... ووقتها طلع عليّا لقب فرحني جدا:
"أصغر ستايلر".
اشتغلت مع ناس كتير... مش بس نجوم، دول أصحابي وعيلتي الفنية:
الصواريخ، دقدق، فانكي، شحته كاريكا، دبل زوكش، وعملنا نجاحات كبيرة في المهرجانات.
ومع تطوري، فتحت مجالات تانية، واشتغلت مع نجوم كبار زي:
أصالة، هاني عادل، ليلى علوي، حكيم، صابر الرباعي، وغيرهم كتير من أهم وأكبر الأسماء اللي فخور إني اشتغلت معاهم.
وشاركت كمان في مشروع بين عمرو دياب وشركة ONE Development، واشتغلت مع براند المجوهرات Frozen Jewelries، وقدرنا نوصّل شغلنا لمجلات عالمية ونجحنا في دول أوروبية.
اشتغلت مع أكبر شركات المزيكا في مصر، ومع أهم الناس اللي ورا الكواليس واللي صنعوا أجيال كاملة من نجوم العالم العربي.
واللي ناس كتير مش عارفاه...
إني لحد النهاردة، بشتغل لوحدي.
مفيش مساعدين، ولا فريق، كل شغلي بعمله بإيدي من أول فكرة لآخر تفصيلة.
لكن مع كل اللي وصلت له، بقيت بفكر كتير...
هو ده الطريق اللي أكمل فيه؟
بفكر في الحلال والحرام، وبسأل نفسي لو جه الوقت اللي أبتدي أركز في نوع تاني من الجرافيك، أبعد فيه عن أجواء الفن والغناء والتمثيل، وأبدأ مرحلة جديدة.
علشان كده دلوقتي بشتغل على بودكاست جديد، نفسي أساعد فيه الشباب، وأنقل لهم خبرتي، وأديهم دفعة، وأفتح لهم طريق يمشوا فيه من غير ما يتعبوا زي ما أنا تعبت.
دي مش نهاية الحكاية...
دي يمكن أجمل بداياتها.
